Bağçadan məktəbə keçid: interaktiv oyunlar uşaqların yeni mühitə uyğunlaşmasını asanlaşdırır VİDEO
Bakı, 16 oktyabr,
Məktəbəqədər təhsil müəssisəsindən ibtidai sinfə keçid uşaqların həyatında mühüm mərhələlərdən biridir. Bağçada daha çox oyun, sərbəst fəaliyyət və ünsiyyət vasitəsilə öyrənən uşaqlar məktəbdə təhsilə başladıqda yeni qaydalara, dərs rejiminə və nizam-intizam tələblərinə uyğunlaşmalı olurlar. Bu mərhələdə müəllimin fərdi yanaşması, interaktiv təlim üsulları və qısa istirahət fasilələri uşaqların məktəb mühitinə alışmasına, dərsə marağının artmasına və öyrənmə prosesində fəal iştirakına kömək edir.
Bu sözləri müsahibəsində 276 nömrəli məktəbin ibtidai sinif müəllimi İlahə Piriyeva deyib. Müəllim bildirib ki, məktəbəqədər dövrdə sərbəst oyunlara və hərəkətli fəaliyyətlərə daha çox vaxt ayıran uşaqlar sinif şəraitində müəyyən qaydalara əməl etməyə, diqqətlərini dərsə yönəltməyə və yeni rejimə uyğunlaşmağa ehtiyac duyurlar. Uşaqların yaş xüsusiyyətlərini nəzərə almaq, onların yorğunluğunu azaltmaq və təlim prosesini maraqlı təşkil etmək ibtidai siniflərdə xüsusi əhəmiyyət daşıyır. Bağçadan gələn uşaqların həyatında, həqiqətən də, böyük dəyişiklik baş verir. Bağçada uşaqlar daha sərbəst olurlar, müxtəlif oyunlar oynayır, fəaliyyətlərini nisbətən az məhdudiyyətlərlə qururlar. Məktəbə gəldikdə isə onlar parta arxasında əyləşməyə, dərs rejiminə, sinif qaydalarına və nizam-intizam tələblərinə uyğunlaşmağa başlayırlar. Bağçada oyunlar uşaqların gündəlik fəaliyyətinin mühüm hissəsini təşkil etdiyi halda, məktəbdə bu fəaliyyətlər əsasən dərs prosesinə uyğun şəkildə təşkil olunur.
“Biz müəllimlər də bu keçid mərhələsini nəzərə alaraq, uşaqlara fərdi yanaşmağa çalışırıq. Dərs zamanı onların yorulduğunu hiss etdikdə qısa istirahət imkanı yaradırıq. Bəzən uşaqlardan başlarını partanın üzərinə qoyaraq təxminən beş dəqiqə dincəlmələrini xahiş edirik. Məqsədimiz onların yorğunluğunu azaltmaq, diqqətlərini bərpa etmələrinə və dərsin növbəti hissəsində daha fəal iştirak etmələrinə şərait yaratmaqdır.
İbtidai siniflərdə uşaqların dərsə marağını qorumaq üçün interaktiv təlim üsullarından geniş istifadə edirik. Videoçarxların nümayişi, şəkillər üzərində iş, rollu oyunların təşkili və müxtəlif əyani vasitələrdən istifadə dərsləri daha canlı və anlaşıqlı edir. Bu üsullar uşaqların diqqətini cəlb etməklə yanaşı, onların öyrəndikləri mövzuları daha yaxşı mənimsəmələrinə də kömək edir. Çünki kiçikyaşlı məktəblilər üçün öyrənmə prosesinin maraqlı, hərəkətli və onların yaş xüsusiyyətlərinə uyğun qurulması vacibdir”, - deyə o qeyd edib.
Onun fikrincə, bağçadan məktəbə keçid zamanı uşaqların uyğunlaşma prosesinə anlayışla yanaşmaq, onlara həm öyrənmək, həm də dincəlmək üçün imkan yaratmaq vacibdir. Təlim prosesində oyun elementlərinin tətbiqi və interaktiv fəaliyyətlərin təşkili uşaqların məktəb mühitinə daha rahat alışmasına, dərsə həvəslə yanaşmasına və yeni bilikləri mənimsəməsinə müsbət təsir göstərir.